Yosi, protagonista dos Suaves anos despois

“Dos suevos a Los Suaves, poderíamos resumir este período milenario da historia de Ourense, contando hoxe aquí con Yosi Domínguez como protagonista, que segue axigantando a lenda do seu mito”, expresou o presidente da Deputación de Ourense, Manuel Baltar, no multitudinario acto de presentación do libro Canciones, algún desliz y dos o tres fotografías, do que é autor o líder de Los Suaves, actividade celebrada esta mañá no Centro Cultural “Marcos Valcárcel” da Deputación de Ourense. A obra recolle en dous volumes a traxectoria literaria, musical e gráfica dun dos máis grandes do rock en español: Yosi Domínguez.

“Los Suaves, Yosi, -expresou Baltar- dezaséis séculos despois dos suevos conquistaron o rocanrol con LP’s inesquecibles e cunha potente posta en escena que os elevou á categoría de mitos, sen discusión algunha”, engadindo que Yosi, e polo tanto Los Suaves, “teñen na Deputación de Ourense que me honro en presidir ao primeiro seguidor, porque recoñecemos unha traxectoria sen par, sempre marcada polo orgullo de pertenza a Ourense, a bandeira que nunca deixaron de ondear; por iso son Medalla de Ouro da provincia, porque Los Suaves e Yosi son de ouro, ouro de Ourense”, remarcou Manuel Baltar.

O presidente do goberno provincial destacou que “Yosi é o noso Dylan, ou quizais deberíamos dicir que Dylan é o Yosi norteamericano”, remarcando que cada día que pasa “o seu corazón de rock segue latexando e a súa lenda axigántase, grazas á súa música e ás súas letras que son obras de arte, poesía da boa, interpretada coa inconfundible forza de Yosi”.

“Estamos a vivir o “Día de San Yosi” e a “Yosimanía”, afirmou Manuel Baltar, quen rematou a súa intervención dicindo que hoxe o león da bandeira de Ourense é un gato, que non leva espada senón harmónica; maúlla e chámase José Manuel Domínguez Álvarez”.

Pola súa banda, Yosi, agradeceu as mostras de cariño e confesou que “o gusanillo de volver sempre está aí”, e en relación ao libro afirmou: “Deixo algunha que outra canción e que elas falen por min”. “Este é un día especial e quero agradecervos a todos a vosa presenza, sei que moitos chegastes de lugares moi lonxanos para estar hoxe aquí, movidos pola vosa amizade, e como este libro escribino para amigos, agardo que me xulguedes como iso, como un amigo”, expresou Yosi. “Escritores, pintores, debuxantes, poetas, fotógrafos, quero agradecer a todos os que participaron neste libro, poñendo a alma nel”, dixo.

O acto contou tamén coa participación do actor Manuel Manquiña; do historiador Afonso Vázquez Monxardín; do escritor Bieito Iglesias; e do vocalista de “Obús”, Fortu Sánchez, quen expresou o sentimento unánime de todos os presentes: “Todos desexamos a túa volta, Yosi, eres moi importante para o rocanrol”.

O libro, editado pola Deputación de Ourense, consta de dous volumes: un coa poesía e as cancións de Yosi e o segundo, con fotografías, documentos e artigos de opinión sobre a traxectoria do rockero. “Un culto libro de culto”, como o definiu Alfonso Vázquez Monxardín.

A parte musical da presentación estivo a cargo do grupo de rock Derroche, quen tocou dous temas de Yosi: “Por una vez en la vida” e “Siempre igual”, cantada polo propio Yosi, quen, a petición do público, agasallou a todos interpretando dito tema.

Es necesarios estar conectado para escribir un comentario Conectar