Santiago Lamas e Alfonso Mato gañan o Premio Ramón Piñeiro

Alfonso Mato e Santiago Lamas gañan o premio Ramón Piñeiro

A obra De camiños, viaxeiros e caminantes. Peregrinos de NÓS ao cabo do mundo, da que son autores Alfonso Mato e Santiago Lamas, resultou gañadora do Premio Ramón Piñeiro de Ensaio 2015, que organizan conxuntamente a Secretaría Xeral de Política Lingüística da Xunta de Galicia e Editorial Galaxia coa colaboración de Gas Natural Fenosa. A xuntanza do xurado realizouse hoxe, día 21 de decembro de 2015, ás 10h30, no Centro Ramón Piñeiro, en Santiago de Compostela, onde unhas horas máis tarde foi presentado o nome da obra gañadora en rolda de prensa por parte de Víctor F. Freixanes, director xeral de Editorial Galaxia; Amalia Baltar, en representación de Gas Natural-Fenosa; e Valentín García, secretario xeral de Política Lingüística da Xunta de Galicia. Tamén estiveron presentes Luis Alonso Girgado e Carlos Lema, membros do xurado.

O ensaio premiado nesta décimoquinta edición do Premio Ramón Piñeiro, que está dotado con 3.000 euros e ha ser publicado por Editorial Galaxia durante o ano próximo, trata o tema da viaxe que en 1927 fixeron a Santo André de Teixido Otero Pedrayo, Vicente Risco e Ben-Cho-Shey. En De camiños, viaxeiros e caminantes. Peregrinos de NÓS ao cabo do mundo, os autores desenvolven unha reflexión profunda e suxerente sobre a relación entre camiño e literatura, movemento e lectura. O texto dialoga desde a actualidade cunha Galicia europea de inicios do século XX, mediante un estilo aberto e rico que, de xeito ameno, nos interroga sobre os grandes desafíos da Galicia de hoxe.

Santiago Lamas (Pontevedra, 1944), psiquiatra, é autor, entre outros títulos, dos ensaios Notas para una teoría de la realidad (1988), Imarginaciones (1988), Sobre el yo y otros objetos no identificados (1994), Galicia borrosa (2004), Ferrín e outras historias (2007) e Fíos e lecturas (2011) e Fisterras Atlánticas (2012). Foi Premio Fernández del Riego de xornalismo en 2008.

Alfonso Mato é historiador e documentalista. Traballou na Gran Enciclopedia Gallega e no Instituto Galego de Información que dirixiu en Santiago d eCompostela Isaac Díaz Pardo. É autor de diversos traballos sobre a historia e a cultura da Galicia contemporánea, como o que lle adicou ao Seminario de Estudos Galegos. Ademáis, ten colaboradoa en obras coelctivas, como a edición crítica do Sempre en Galiza de Castelao ou Ánxel Casal, un editor para un país. Catálogos de Lar e Nós.

O xurado, que concedeu o premio por unanimidade, estivo formado por Luís Alonso Girgado, Lourenzo Fernández Prieto, María López Sández, Dolores Vilavedra e Carlos Lema, como secretario con voz e voto, e salientou a calidade dos catro orixinais presentados, así como a variedade de temas tratados neles.

Es necesarios estar conectado para escribir un comentario Conectar