Minuto de silencio no Parlamento de Galicia en memoria das vítimas da COVID-19

O Parlamento de Galicia gardou este mediodía un minuto de silencio en memoria das persoas falecidas por mor da COVID-19, no marco do loito oficial declarado. A concentración estivo encabezada polo presidente do Parlamento, Miguel Ángel Santalices Vieira, acompañado por portavoces, deputadas e deputados e persoal da Cámara. Tamén participou a valedora do pobo e persoal desta institución.

O presidente do Parlamento reiterou, como veu facendo nas diferentes sesións da Deputación Permanente celebradas nas últimas semanas, as súas condolencias ás familias que perderon algún ser querido por mor da COVID-19, ao tempo que expresou o seu recoñecemento a todos os profesionais sanitarios e de outras ramas de actividade que garanten funcionamento dos servizos básicos.

Santalices Vieira trasladou tamén unha mensaxe de afecto ás familias das persoas falecidas por causas diferentes á pandemia e que por mor do estado de alarma non puideron velar nin despedirse dos seus seres queridos.

Es necesarios estar conectado para escribir un comentario Conectar