A Xunta inicia a restauración do cubo XXXI da Muralla de Lugo

A Consellería de Cultura e Turismo deu comezo ás obras de restauración do cubo XXXI da Muralla de Lugo, situado á altura da rúa Clérigos. A actuación conta cun orzamento de 142.000 euros e o prazo máximo de execución será de dous meses.

O delegado territorial da Xunta en Lugo, José Manuel Balseiro, visitou a zona e explicou que os traballos corrixirán a filtración de humidades e as patoloxías que provocou a acumulación de auga nos muros interiores neste punto.

Para elo, procederase á escavación manual arqueolóxica do adarve e a escaleira ata a cota orixinal romana, e á impermeabilización da estrutura para posteriormente repoñer en condicións óptimas os muros e petos.

Así mesmo, a intervención permitirá seguir afondando na investigación arqueolóxica do monumento. Realizaranse catas coa finalidade de definir o trazado orixinal do cubo romano e documentarase a escaleira exhumada, incluíndo o levantamento topográfico e fotogrametría 3D.

Balseiro subliñou que a Xunta exerce unha protección “constante e exhaustiva” da Muralla, con labores diarias de mantemento e con intervencións de restauración que se suceden de forma continua. Neste sentido, lembrou que recentemente veñen de rematarse as obras no cubo VII -á altura da porta do Bispo Odoario-, nas que se investiron 273.400 euros.

Intervención

A nova intervención programada supón o desmontado do cubo XXXI e a limpeza manual da pedra, así como a retirada da instalación eléctrica e luminarias para a posterior reposición do conxunto.

No que respecta á escaleira, eliminarase o recheo existente e repoñeranse os chanzos que sexa preciso por razóns de estabilidade e funcionalidade, separando e protexendo as estruturas orixinais; realizarase un novo recheo con cachotería de laxas de lousa en seco e reconstruiranse os muros con retranqueo de 5 centímetros e separación con xeotéxtil do muro orixinal.

A impermeabilización do adarve acometerase mediante un recrecido con recheo de laxas de lousa, separado da estrutura orixinal; protexerase con dobre capa de xeotéxtil con lámina de caucho de butilo, unha capa de arxila natural e capa de grixo.

As actuacións que se executan para garantir a estabilidade do monumento no tempo realízanse con criterios de respecto ao orixinal, segundo o sistema construtivo da época e buscando unha diferenciación clara na intervención das partes novas e das existentes: mediante o uso de xeotéxtis, retranqueos das partes novas, diferenciación de materiais, e sempre mediante sistemas construtivos facilmente removibles.

Es necesarios estar conectado para escribir un comentario Conectar