Lugo:Fomento continuará as obras na Zona Sur e na Mariña

O Ministerio de Fomento vén de ratificar o seu compromiso público e orzamentario para continuar coa execución das infraestruturas proxectadas ou que está a desenvolver tanto na Zona Sur como na Mariña. Así llelo trasladou o secretario Xeral de Infraestruturas, Manuel Niño, aos participantes na reunión desta tarde, quenes estiveron arroupados polo voceiro do PP no Senado, José Manuel Barreiro.

Concretamente, Manuel Niño, que foi o que liderou esta xuntanza, a petición de Barreiro, xunto ao director Xeral de Estradas e o xefe de Demarcación de Estradas de Galicia, Ángel González del Río, destacou que existe unha vontade decidida por parte do departamento estatal para continuar co arranxo da N-540 e a A-76. No caso das da Zona Norte, o propio Manuel Niño avanzou que as obras de reparación da N-642 na súa totalidade comezarán antes do verán, ademais continuar no avance dos proxectos para a execución da A-74.

Deste xeito, dáse continuidade ao compromiso impulsado polo Partido Popular e amosado tamén na moción que defenderán no Senado, a través da que piden, precisamente, o compromiso orzamentario nas anualidades que sexan suficientes para que estas vías de comunicación non queden, como xa dixo en días anteriores o propio Barreiro, “a cachos”.

Concretamente, en dita proposta ínstase ao Goberno a proceder cos fondos necesarios o arranxo das estradas da provincia que están en peores condicións, así como o avance nos trámites administrativos para a execución das autovías que vertebrarán a provincia co resto de Galicia, coa Meseta, e incluso co norte de España.

Neste senso, para dar unha maior viabilidade a este compromiso, e a petición do voceiro do PP no Senado, o secretario Xeral de Infraestruturas comprometeuse a manter unha reunión de seguimento cos afectados cada tres meses, sendo a primeira despois do verán.

Por todo elo, José Manuel Barreiro califica “de positiva a xuntanza, na que creo que demos paso para mellorar as comunicacións da provincia e, o que é máis importante, que estamos a cumprir a palabra dada en días pasados diante dos veciños da Zona Sur e da Mariña”.

 

Estado da estradas da Mariña

No caso da Mariña, a A-74, que vai de Barreiros a San Cibrao, o proxecto do primeiro treito Barreiros-Foz xa se atopa en redacción. Esta importante e demandada arteria de comunicación dispón nas contas deste ano unha partida de máis de 3 millóns de euros que irán destinados á aprobación e redacción dos proxectos para, posteriormente, licitar as obras dos treitos Barreiros-Foz-Burela e para o vindeiro ano case 30 millóns de euros para esta autovía.

No caso da estrada N-642, o importe forma parte dun lote que engloba outras vías das mesmas características na provincia, así como a instalación de novas medias antinéboa para a A-8, e que suma máis de 20 millóns de euros. A este respecto, este ano xa se habilitou unha partida de urxencia de 800.000 euros para reparar aqueles treitos que están en peores condicións. Asemade, noutra orde de investimentos, o voceiro no Senado tamén apuntou que, grazas ao importante paso que se deu coa aprobación das contas, o Estado inxectará 1,3 millóns de euros para a liña de ancho métrico Ferrol-Xixón.

 

Estado das estradas na Zona Sur

Neste caso, o que demandan os populares é que os Orzamentos do Estado inclúan a dotación económica suficiente para seguir impulsando a A-56, cuxo treito San Martiño-A Barrela xa está en obras. No mesmo lote, inclúense os proxectos da variante Norte de Ourense e a A-76. Neste último caso, xa está licitado o contrato para a redacción do proxecto da variante de Monforte de Lemos.

En canto ao Orzamento existe unha partida programada de 13 millóns de euros no ano 18 e para o treito da Barrela máis de 10 millóns, aos que hai que engadir outras dúas de 50.000 cada unha para os treitos de Taboada-Narón e Narón-Guntín. Asemade, para a variante de Ourense, a cantidade consignada ascende a 2,5 millóns. Tamén existen unha programación para as anualidades vindeiras. Concretamente, para o ano 19 hai unha proxección de preto de 21 millóns para A-56 e 11 millóns para a variante e Ourense. O intercomunicador de Guntín, que enlazará coa autovía de Santiago, ten este ano consignados 2,5 millóns, no ano 19 cinco millóns e, en 2020 outros 3,5 millóns.

Asemade, destacaron a importancia dos traballos levado a cabo de reparación do firme da N-540, que soporta un volume importante de tráfico e é de extrema necesidade a súa mellora.

Es necesarios estar conectado para escribir un comentario Conectar