A exposición do mundo suevo ultima a sua montaxe en Ourense

A gran exposición do mundo suevo, In tempore sueborum, que organiza a Deputación de Ourense, ultima estes días a súa montaxe. O presidente da Deputación, Manuel Baltar, visitou a Igrexa de Santa María Nai, unha das tres sedes da mostra, que se está a acondicionar como espazo expositivo para acoller pezas de incalculable valor histórico-artístico sobre a cristianización e a Gallaecia sueva, e que inclúe elementos de sarcófagos, xoias relixiosas, figuras arquitectónicas e obxectos de ouro, prata, outros metais e cerámica, procedentes de máis de dez museos.

A exposición, que será inaugurada o venres, “marcará un fito cultural na historia da provincia de Ourense, como acreditan a calidade das pezas que se exporán, procedentes dos museos máis prestixiosos de Europa”, afirmou Manuel Baltar na visita realizada hoxe para supervisar a montaxe da mostra no espazo expositivo do Centro Cultural “Marcos Valcárcel” e na Igrexa de Santa María Nai.

Este recinto acolle pezas como o Crismón de Quirogaun, anelo signatario con siluetas de peixes en negativo, procedente de Lugo; outro anelo con crismón das termas da rúa Padre Blanco de Astorga e tamén un capitel de Amiadoso, Allariz, procedente do Museo Arqueolóxico Provincial ou un fragmento de sarcófago estrixilado, procedente de Marialba, León. Asemade, a mostra exhibirá un vaso litúrxico de Bobadela, Oporto, e unha patena pintada con cruz, en cerámica, porcedente da Eirexa Vella de O Portiño, San Pedro de Visma, A Coruña, dos séculos IV-VI. Na parte da exposición que acolle Santa María Nai tamén se fai referencia á importante labor cristianizadora levada a cabo por Martiño de Dumio.

O presidente do goberno provincial afirmou que esta exposición conta con elementos tecnolóxicos de vangarda como é unha aplicación para dispositivos móbiles que lle permite aos técnicos da mostra controlar a temperatura de cada unha da urnas nas que se expoñen as pezas, un traballo que estamos a facer con seriedade, profesionalidade e máximo rigor para que os ourensáns e todos aqueles que nos visiten poidan gozar dunha exposición internacional con elementos de hai máis de 1.600 anos, que poñen en valor a importancia dos suevos en Ourense e en Galicia, onde constituíron o primeiro Estado de Europa”.

Baltar subliñou que o tempo que a mostra estará aberta ao público –entre decembro e marzo de 2018- “serán meses de éxito para a nosa cultura, a nosa arte e nosa historia, nunha aposta da Deputación de Ourense por afondar na nosa identidade e traxectoria como pobo”.

In tempore sueborum achega a Ourense un tesouro suevo do século V procedente de 13 museos de Europa. Inaugurarase o vindeiro 15 de decembro na capital ourensá, organizada pola Deputación de Ourense, no que se converterá no evento cultural máis importante da provincia. Compoñen a mostra 250 elementos de alto valor histórico e artístico, entre os que destacan xoias e pezas ornamentais dunha princesa sueva, e diversos utensilios e figuras artísticas en ouro, prata, bronce, vidro, madeira e ámbar, así como material funerario. A exposición fai un percorrido polo tempo dos suevos na Gallaecia medieval (411-585) “reunindo a colección máis destacada que se ten realizado, con pezas de 39 museos de 10 países, e en cuxo catálogo participaron 60 investigadores”, afirma Manuel Baltar.

Es necesarios estar conectado para escribir un comentario Conectar