Pontevedra:
Intento de salvar o vello carballo de Santa Margarida

Técnicos da do departamento municipal de Medio Natural e da Estación Fitopatolóxica do Areeiro apuran as actuacións de urxencia autorizadas pola Consellería de Medio Ambiente, seguindo o ditame derivado da avaliación do estado desta árbore senlleira feita polos expertos do Areeiro a petición da Concellería de Medio Natural após da caída dunha pola seca de 200 quilos o pasado 31 de xullo.

Primeiro foi unha poda de saneamento e a suxeición das ramas máis pesadas, despois comezouse coa aplicación do tratamento con insecticida biolóxico contra os insectos xilófagos e hoxe foi a quenda da realización de catas e apertura de ocos no asfalto co fin de osixenar as raíces da árbore centenaria. Estes ocos serán recheos con area e grava para manterlle a humidade.

Sete días despois da caída da pola do carballo de Santa Margarida, o concelleiro de Medio Natural, Alberto Oubiña, xa contactara coa Estación Fitopatoloxica do Areeiro e os seus técnicos tiñan feito xa unha avaliación do estado da árbore. O 21 de agosto, previa autorización da Xunta -o carballo está incluído no Catálogo de árbores senlleiras- comezaron os tratamentos dirixidos a conseguir mantelo vivo nas mellores condicións.

A Concellería de Medio Natural, que dirixe Alberto Oubiña, púxose tamén en contacto coa Xunta – consellerías de Cultura e Medio Ambiente- e coa Delegación de Patrimonio do Arcebispado de Santiago co fin de coordinar, ademais desta actuación urxente, unha estratexia de longo percorrido para conservar e manter no mellor estado posíbel o carballo de Santa Margarida.

.


© 2011 Galega de Comunicación e Información, S.L.U. - Aviso legal - Contacto