Ourense:Baltar e Gestal presentan o Vademecum do Termalismo en Galicia

 


O presidente da Deputación de Ourense, Manuel Baltar, e o decano da Facultade de Medicina de Santiago de Compostela, Juan Gestal, presentaron no Centro Cultural «Marcos Valcárcel» o Vademecum das augas mineiro-medicinais de Galicia, unha publicación que estará a disposición da cidadanía na web da Deputación de Ourense e que reúne, segundo explicou o presidente provincial, «as indicacións, procedementos e estudos sobre as augas termais en Galicia, así como as localizacións dos recursos e establecementos balnearios galegos».Manuel Baltar lembrou na presentación o papel desempeñado polo doutor Rodríguez Míguez no termalismo contemporáneo, de quen dixo «será distinguido coa Medalla de Ouro da Provincia, a título póstumo», e a agradeceu ao decano de Medicina «o impulso que a Universidade de Santiago e a Cátedra de Hidroloxía Médica están a dar ao noso termalismo, un pulo no que a Deputación participa co desenvolvemento do Plan «Ourense, a provincia termal».

Baltar, quen convidou a Juan Gestal a participar no Consello Termal Ourensán, expresou que falar de auga e termalismo «é falar de Ourense, e agradezo ao decano de Medicina que elixira Ourense para presentar esta obra, un gran traballo de investigación que analiza as augas termais de Galicia e que resalta e potencia o noso termalismo».

O presidente da Deputación destacou o un pulo que a institución provincial lle está a dar ao termalismo co desenvolvemento do Plan «Ourense, a provincia termal», conxuntamente coa Xunta de Galicia, «porque cremos que o termalismo é un eixo fundamental de desenvolvemento para o turismo, a economía e a saúde no noso territorio», e remarcou a importancia do «Pacto Termal Nacional» -iniciativa promovida por Manuel Baltar-, o cal presentou no «XII Encontro de vilas termais» celebrado hai semanas en Caldas de Reis e Cuntis, «un plan que ten como obxectivo promover o valor económico, cultural e de saúde do termalismo e aproveitar as oportunidades que ofrece este sector en España», expresou o presidente do goberno provincial.

«O plan pretende un desenvolvemento turístico termal eficiente, sustentable e de calidade, con melloras das infraestruturas termais, liñas de axudas para instalacións, investigación e actividades turísticas, e campañas de divulgación das vilas e territorios termais», afirmou Baltar, quen tamén valorou positivamente a colaboración entre a Deputación de Ourense e a Universidade de Santiago, por medio da Facultade de Medicina, para que o Complexo Hospitalario de Ourense teña a consideración de «Universitario».

Juan Gestal explicou que o Vademecum termal «é un traballo promovido e desenvolvido pola Cátedra de Hidroloxía Médica da Universidade de Santiago, que abrangue capítulos nos que se estudan as augas mineiro-medicinais, a súa importancia terapéutica, clasificación, mecanismos de acción, así como as técnicas de administración das augas termais e a situación actual da investigación no ámbito do termalismo en Galicia.

O Vademecum permite coñecer os últimos avances na análise das augas mineiro-medicinais dos balnearios e empresas envasadoras de augas mineiras de Galicia, e tamén actualiza a información sobre a súa historia, a data de declaración de utilidade pública das augas, as autorizacións dos balnearios como centros sanitarios, as indicacións terapéuticas e o perfil das persoas que realizan tratamentos coas augas termais de Galicia.

Gestal subliñou que hai que seguir potenciando o termalismo. «En Galicia temos unhas 300 surxencias, das cales na actualidade se explotan 21, todas están situadas no ámbito rural, coa importancia que isto ten para xerar economía e fixar poboación no rural».

Es necesarios estar conectado para escribir un comentario Conectar