25 anos da festa de exaltación do pan de Cea

Baltar_presentación Festa do Pan de Cea
O presidente da Deputación de Ourense, Manuel Baltar, reicibiu no Pazo Provincial ao alcalde de San Cristovo de Cea, José Luis Valladares, e ao presidente do Consello Regulador da Indicación Xeográfica Protexida (IXP) “Pan de Cea”, acompañado por José de Lama, membro da directiva do consello, con que analizou as actividades que se están a programar na edición de 2016, na que se cumpre o 25 aniversario da exaltación “do mellor pan do mundo, que ten gran proxección nacional e internacional e cuxa elaboración por parte dos artesáns panadeiros de Cea supón manter viva unha tradición de séculos que naceu na contorna do Mosteiro de Oseira e que ten o recoñecemento que merece como Festa de Interese Turístico”, afirmou o presidente do goberno provincial trala reunión.

Este ano as actividades vanse ver incrementadas pola conmemoración da efemérides, motivo tamén polo cal a Deputación de Ourense será co-organizadora do evento. O programa de actos desenvolverase entre os días 2 e 3 de xullo coa tradicional ruta dos fornos e a celebración festiva e gastronómica, ao que nesta edición hai que engadir unha andaina solidaria. Ademais, no programa, que será presentado proximamente, inclúense actuacións musicais e degustación de produtos, actividades de showcooking e competicións deportivas, “todo elo para destacar ao produto estrela da gastronomía ourensá, un referente de tradición social que singulariza aínda máis a riqueza etnográfica da nosa provincia”, expresou Manuel Baltar.

Es necesarios estar conectado para escribir un comentario Conectar