Ourense, «destino turístico intelixente»

Baltar_Ourense_primeira provincia intelixente

O presidente da Deputación de Ourense, Manuel Baltar, reuniuse hoxe no Campus de Ourense cos expertos científicos de máis relevancia no ámbito turístico en España, con quen analizou o proxecto no que están a traballar, referido a «Destinos turísticos intelixentes», unha iniciativa que ten como obxectivo aplicar os últimos avances tecnolóxicos na xestión, xeo-localización e posicionamento turístico na procura de novos mecanismos para impulsar a innovación nos destinos co desenvolvemento das TICs. A finalidade é crear servizos diferenciais e altamente competitivos con base na tecnoloxía aplicada ao turismo.

Na reunión, Manuel Baltar propúxolles aos expertos ampliar o estudo que están a realizar para que contemple non só localidades concretas senón que abranga todo o territorio provincial e incorpore o concepto de «provincia intelixente» que está a promover Manuel Baltar, referido á provincia de Ourense, «co obxectivo de que este proxecto teña unha base territorial máis ampla, contemplando á provincia como un todo á hora de levar a cabo iniciativas turísticas innovadoras e de vangarda», afirma Manuel Baltar.

 

PRIMEIRA PROVINCIA NA CATALOGACIÓN

 

O expertos turísticos amosáronlle ao presidente do goberno provincial o seu interese por abrir esta nova canle de estudo que propón Manuel Baltar, que inclúe ese concepto integral de provincia, e que se concretaría na realización dun estudo turístico específico para a provincia de Ourense, que levaría a cabo un equipo multidisciplinar de expertos en turismo, co apoio da Deputación de Ourense e a Universidade de Vigo, «para que Ourense sexa a primeira provincia que teña a catalogación de Destino Turístico Intelixente», explica Manuel Baltar e engade que este distintivo permitiría «aplicar as innovacións tecnolóxicas que nestes momentos realizamos co programa de Termalismo Saúdable a outros ámbitos do turismo como son a natureza, a arquitectura, o patrimonio histórico-artístico, a etnografía, a cultura, os deportes de inverno e o termalismo deportivo, todo elo contemplado como un único destino que teña a súa base nunha nova forma de facer e de xestionar o turismo por medio das vantaxes que permite a tecnoloxía».

 

EXPERTOS E INVESTIGADORES

 

Na reunión participaron xunto a Manuel Baltar, os expertos e investigadores Antonio Guevara Plaza. presidente da Rede Intur, decano da Facultade de Turismo de Málaga e responsable deste proxecto na Costa del Sol; Eduardo Parra, presidente da Asociación Española de Expertos Científicos en Turismo e responsable do proxecto en Canarias; Fernando Vera, coordinador do Doutoramento Interuniversitario en Turismo e responsable do proxecto en Alicante, e José Antonio Fraiz Brea, coordinador do Máster Universitario en Dirección e Planificación do Turismo de Interior e Saúde.

Neste traballo referido aos Destinos Turísticos Intelixentes, ao que se incorporará a provincia de Ourense, tamén participan os territorios de Asturias e Curitiba (Brasil).

O feito de que Ourense sexa o primeiro territorio provincial que se converta nun «Destino Turístico Intelixente» permitirá levar a cabo unha estratexia de revalorización da provincia e aumentar a súa competitividade, mediante un mellor aproveitamento dos seus atractivos naturais, deportivos e culturais, como tamén mellorar a eficiencia dos procesos de produción e distribución que facilitan o desenvolvemento sostible e a interacción dos visitantes.

Es necesarios estar conectado para escribir un comentario Conectar