O Concello celebrará un mínimo de dous plenos anuais fóra de María Pita

A concelleira de Participación e Innovación Democrática, Claudia Delso, participou na mañá deste luns na Comisión de Participación, na que se acordou realizar un mínimo de dúas sesións plenarias fóra do pazo de Concello A Coruña_fachadaMaría Pita ao ano. Serán, segundo se decidiu na xuntanza, nun espazo municipal que dispoña do aforo suficiente e boa sonoridade, e que permita desenvolver o pleno con comodidade e realizar a retransmisión por  streaming. Tal e como avanzou a responsable municipal, o primeiro destes plenos terá lugar a finais de abril ou principios de maio e servirá para debater sobre o estado da cidade. O formato dese Pleno de Debate definirase na próxima xuntanza da Comisión, que quedou fixada para o vindeiro 14 de marzo.

“O Concello amplía así a súa aposta pola participación, que xa conta con outras canles abertas para permitir aos veciños e veciñas o contacto directo coa Corporación”, salientou ao remate da Comisión Delso, quen fixo referencia á iniciativa de rendición de contas posta en marcha polo Goberno local ‘Dillo Ti’, que volverá celebrarse este sábado (12.00 horas) no centro cívico de Palavea, onde a veciñanza poderá conversar co alcalde e os concelleiros e concelleiras do equipo de Goberno para expoñerlles as súas suxestións e demandas ou formular dúbidas relativas á xestión municipal. Como lembra a concelleira desta área, a esta acción, que se celebra de xeito mensual desde principios de ano, súmanse outras como o ‘Escano Cidadán’, que permite a veciños e veciñas participar nos Plenos e trasladar sen intermediación as súas preocupacións, dúbidas e demandas aos membros da Corporación municipal, ou ‘A Porta Aberta’, o programa que impulsa os procesos participativos, para abrir á cidadanía decisións relevantes da cidade, e que xa ten en marcha dous destes procesos, un relativo á organización da cidade en distritos e un segundo sobre mocidade. A estas canles únese, recorda Delso, o servizo 010,  un teléfono gratuíto que ofrece información sobre calquera tema ou cuestión que dependa do Concello, e a través do cal é posible tamén suxerir melloras ou presentar reclamacións.

Es necesarios estar conectado para escribir un comentario Conectar