A Deputación de Pontevedra acomete o acondicionamento do Camiño portugués

Camiño Portugués_Tui

A Administración provincial investirá 1 millón de euros este ano na “consolidación definitiva” deste camiño
Preto de 100 operarios comezarán este luns a traballar nas tarefas de limpeza e acondicionamento do Camiño Portugués a Santiago no treito comprendido entre Tui e Pontecesures. Así o anunciou esta mañá o presidente da Deputación.
Os traballadores recibiron hoxe o equipamento necesario para realizar un traballo que pretende que, nun prazo de seis meses, todo o percorrido do camiño pola provincia de Pontevedra estea en perfectas condicións de limpeza.
Louzán destacou que se trata tan só dunha das partes do proxecto conxunto que a Deputación, os 12 concellos da ruta e a Xunta de Galicia están a levar a cabo para “a consolidación definitiva” dunha ruta que realizan milleiros de persoas cada ano.
Parte construtiva
A estes labores iniciais sumaranse posteriormente, e tal e como anunciou o presidente da Deputación, outros traballos máis complexos orientados a mellorar a seguridade nos cruces e nos puntos máis conflitivos.
No detalle das obras necesarias está a traballar xa unha consultora e, unha vez entregado o proxecto, a Deputación procederá a licitar os traballos. Estas obras incluirían a construción dalgunha ponte de madeira en lugares de especial dificultade de tránsito nos meses de choiva, a aplicación de zahorra ou o empredrado dalgúns puntos ou a sinalización, entre outras.
Os traballos realizaranse nos concellos de Tui, O Porriño, Mos, Redondela, Soutomaior, Vilaboa, Pontevedra, Barro, Portas, Caldas de Reis, Valga e Pontecesures, e os operarios distribuiranse en función do número de quilómetros que haxa que cubrir en cada concello.
Delimitación
O presidente da Deputación indicou que todos os traballos se realizarán seguindo a delimitación do trazado na que traballa a Dirección Xeral de Patrimonio, co obxectivo de “respectar a ruta orixinal” e contribuír a consolidación da mesma.

Es necesarios estar conectado para escribir un comentario Conectar