A Deputación de Pontevedra crea 400 bolsas para prácticas en empresas

 

Louzan_sala prensa Deputación Pontevedra
A Deputación Provincial de Pontevedra vén de aprobar o II Plan de Práctica Laboral que concederá bolsas a 400 titulados universitarios e de ciclos superiores de FP para que poidan realizar prácticas en empresas privadas.
Os beneficiarios deste Plan serán titulados sen experiencia laboral previa e menores de 35 anos, aos que se lle vai ofrecer a oportunidade de desenvolver labores relacionadas coa profesión na que se formaron en diversas empresas da provincia.
Así o anunciou esta mañá o presidente da Deputación Provincial, Rafael Louzán, na rolda de prensa posterior a Xunta de Goberno, onde salientou que é unha medida coa que a Administración Provincial quere contribuír, como xa vén facendo á redución do desemprego, principal preocupación cidadá nestes momentos.
Nesta liña, tras valorar os datos do paro rexistrado coñecidos hoxe, incidiu na necesaria colaboración entre sector público e privado para que “o cambio de tendencia” que xa se percibe se consolide e comece a xerarse emprego e riqueza.
Louzán salientou o éxito do primeiro Plan de Práctica Laboral, dando fe da satisfacción tanto de bolseiros como de concellos, e asegurou que isto animou á Administración provincial a poñer en marcha esta nova fase, na que serán as empresas privadas as que reciban aos bolseiros.

PROCEDEMENTO
A materialización deste Plan farase en dúas fases, na primeira delas abrirase un prazo para que as empresas interesadas, que terán que ter a súa sede social na provincia de Pontevedra, se sumen ao proxecto.
Este prazo será de 20 días hábiles contados a partir da publicación no Boletín Oficial da Provincia (a vindeira semana). Poderán presentarse empresas de calquera natureza xurídica e de calquera sector, sempre e cando cumpran cuns requisitos como son os de non ter contrato de servizos coa Deputación, que a súa actividade estea relacionada co perfil das titulacións demandadas ou non ter realizado despedidos improcedentes, entre outros.
Á hora de seleccionalas, puntuarase cun máximo de cinco puntos o proxecto de práctica laboral e con ata 4 puntos o deseño de itinerarios alternativos de inserción, que dean opción ao bolseiro a ter continuidade na empresa.
A cooperación entre a Deputación Provincial e as empresas da provincia que resulten beneficiarias materializarase a través dun convenio no que se establezan os dereitos, obrigas e compromisos de cada unha das partes.
PERFÍL
Esta primeira fase permitiralle á Deputación determinar a demanda de bolseiros existente para, en base a ela, abrir a fase de selección de titulados.
Unha vez decididas as titulacións e prazas que se convocan, farase a convocatoria pública e procederase á selección e contratación dos traballadores.
720 operarios
A maiores, a Xunta de Goberno aprobou tamén a contratación de 720 novos traballadores para os concellos da provincia, no marco do Plan de Emprego que xa ten nestes momentos a outros 720 empregados prestando servizos de interese colectivo nos municipios.
Neste caso, trátase de prazas orientadas a desempregados sen prestación e non de titulados. Os novos contratados substituirán aos contratados na primeira fase deste plan, e que rematan os seus contratos en torno a finais de setembro.
Con estas dúas novas iniciativas, son preto de 3.000 as persoas que a Deputación provincial de Pontevedra contratará ao longo de 2013, cun investimento de preto de 20 millóns de euros.
«CAMIÑAR XUNTOS»
Louzán situou estas medidas na necesidade de camiñar xuntos para poñer freo ao desemprego e valorou os datos coñecidos hoxe e que sitúan a Pontevedra como a provincia galega na que máis descendeu o paro, con 4,37%.
“Levamos catro meses consecutivos de baixada do paro nesta provincia, cinco no conxunto de España”, asegurou, para afirmar que isto “evidencia un cambio de tendencia que nos ten que dar idea de que estamos no camiño correcto”
A xuízo de Louzán “mentres o nivel de paro sexa tan elevado, non hai lugar para o triunfalismo, pero si para ser positivos”, polo que reiterou o compromiso da Administración de seguir mantendo como prioritaria a loita contra o desemprego.

Es necesarios estar conectado para escribir un comentario Conectar