A CIG planifica o seu calendario: folga en Galicia «en febreiro ou marzo»

   O secretario xeral da CIG, Suso Seixo, anunciou que para o mes de febreiro ou marzo de 2013 se baralla a posibilidade de convocar unha folga xeral en Galicia a propósito da negociación colectiva, para o que espera contar coa adhesión doutras forzas sindicais. «Trabállase en sectores onde os convenios non se negocian porque a patronal non senta e se corre o risco de que pase o ano de prórroga», explicou Seixo.

Con motivo da manifestación celebrada en Pontevedra co lema ‘Contra a represión sindical e a reforma do Código Penal’ por parte do Goberno central, na que participou case un millar de persoas, Suso Seixo avanzou que xa se está a «traballar cos delegados» co obxectivo de «unir os convenios que estean nesa situación».

Sobre a unidade sindical, Seixo mostrouse partidario de «construila pola base», argumentando que «non serve unir as cúpulas sindicais» se non se plasma nos centros de traballo. Nese sentido, prevé que as «presións» da patronal terán como consecuencia a perda de vixencia de convenios durante o próximo ano, polo que a «unidade sindical é fundamental» para combater as «condicións mínimas» ás que han de enfrontarse os traballadores.

MANIFESTACIÓN

A manifestación convocada pola CIG, e que contou coa presenza de cargos políticos como o voceiro nacional do BNG, Guillerme Vázquez; o deputado Bieito Lobeira e o alcalde de Pontevedra, Miguel Fernández Lores, pretendía reivindicar o movemento sindical ante casos como a condena a tres sindicalistas sobre os que pesaban tres anos de prisión, que finalmente foron absolvidos pola Audiencia Provincial de Pontevedra.

Suso Seixo valorou que esta sentenza defende o dereito fundamental de folga e preserva o seu rango constitucional, ademais de considerar fundamental o papel dos piquetes informativos». O secretario xeral da CIG acusou o PP de «atacar o movemento sindical dende o punto de vista ideolóxico facendo crer que son obsoletos, cando nos tempos que corren teñen máis razón de ser que nunca».

Así, puxo como exemplo as multas e condenas de prisión impostas a varios «compañeiros» pola súa participación en mobilizacións sociais ou sindicais, polo que o caso dos tres sindicalistas que foran procesados en Pontevedra tras a folga no sector do comercio de 2009 «non é un feito illado».

Tamén advertiu que no seu «intento de criminalizar e reprimir o movemento sindical», o PP «preme claramente» a xuíces e fiscais «próximos» a este partido «para que se actúe con dureza contra o movemento sindical e a contestación cidadá ás políticas antisociais».

MODELO ELITISTA

Seixo acusou de «elitista, clasista e profundamente antidemocrático» o «modelo de sociedade» que pretende implantar o Goberno do PP «aproveitando a crise económica», polo que o aumento da «contestación social» que terá o «recorte de dereitos laborais e sociais» terá como consecuencia que «vai seguir a política da represión».

Nesa liña, para o secretario xeral da CIG, as reformas que propón o ministro de Xustiza, Alberto Ruíz-Gallardón, no que respecta ás taxas xudiciais leva consigo «dificultar» o acceso dos cidadáns á tutela xudicial; ao igual que a reforma do Código Penal que «considera delito actividades sindicais que ata agora non tiñan esa consideración» ou prevé penas maiores a certos delitos de orde público, o que supón «un ataque ás liberdades públicas e os dereitos conquistados despois de anos de loita», engadiu Suso Seixo.

Tras a manifestación da CIG polas rúas de Pontevedra, que concluíu ante a subdelegación del Gobierno baixo un intenso trebón, a central nacionalista secundará o próximo 20 de decembro as concentracións convocadas pola Alianza Social Galega para protestar contra as medidas do Goberno en materia de pensións, educación, sanidade, xustiza, a reforma da lei hipotecaria e a situación derivada das participacións preferentes.

Es necesarios estar conectado para escribir un comentario Conectar