O Bloque debilítase coas contínuas escisións: «estanse a confundir»

   O voceiro do BNG no Congreso dos Deputados, Francisco Jorquera, considerou que os colectivos que abandonan a formación nacionalista «estánse a confundir», pois son «decisións» que «o único que levan consigo é debilitar ao Bloque, a forza política que representa en Galicia a alternativa ao Partido Popular».

Deste xeito pronunciouse o tamén candidato á Xunta do BNG ao ser preguntado polos medios de comunicación sobre a saída da fronte do Partido Nacionalista Galego, durante un acto celebrado este domingo en Paiosaco (A Coruña).

Ao seu xuízo, estas «decisións», o «único que levan consigo é debilitar ao BNG» nun momento no que o «Partido Popular sofre unha deterioración importante» froito «das políticas que leva a cabo en Galicia». Así, criticou que as escisións das correntes «debilitan a forza política que presenta en Galicia a alternativa ao PP».

Con todo, asegurou que «a inmensa maioría dos militantes» que formaban parte da fronte cando se celebrou a Asemblea Nacional «seguen na formación» e están «comprometidos con facer do Bloque unha forza máis forte e unida».

REFORMA LABORAL

Por outra parte, na súa intervención, o dirixente nacionalista recordou «as consecuencias particularmente negativas» que a reforma laboral do Goberno central ten para a Galicia, dado que «precariza as condicións laborais» e «rebaixa os salarios», cuestións que nesta comunidade xa son «moi inferiores ao resto do Estado».

Neste sentido, recordou que a norma «abre múltiples vías» para a rebaixa xeral de salarios», crea «unhas condicións laborais máis precarias» e «quebra por completo o principio no que se asentaban as relacións laborais» ao posibilitar que «as empresas as cambien unilateralmente».

Ademais, Francisco Jorquera augurou que a reforma «só provocará máis crise e máis paro» pois «renuncia a modificar o patrón de crecemento que levou» á recesión.

Es necesarios estar conectado para escribir un comentario Conectar