Chega ao porto de Vigo o “Ratonero”, de O Grove, con tres toneladas de cocaina

O valor dos arredor de tres mil quilos  de cocaína aprehendidos no pesqueiro ‘Ratonero’, que chegou este martes a Vigo tras ser abordado a semana pasada nunha operación de Garda Civil e Axencia Tributaria, alcanzaría os 100 millóns de euros por xunto, unha contía que se incrementaría considerablemente na venda minorista.

O ‘Ratonero’ chegou este martes ao peirao da cidade olívica remolcado polo buque ‘Petrel’ da Axencia Tributaria, e onde se procedeu a desembarcar a droga -uns 90 fardos-, realizar os test e a pesaxe definitiva. Tamén chegaron os cinco tripulantes do pesqueiro, os cales permanecen detidos e pendentes de pasar a disposición xudicial.

90 fardos de cocaina que totalizan tres toneladas de cocaina ou 100 millóns de euros

O subdelegado do Goberno en Pontevedra, Antonio Coello, recordou que o buque foi apreixado, dentro da operación ‘Marine’ o pasado 21 de febreiro a unhas 2.100 millas das costas galegas, ao noroeste de Canarias e ao sur de Azores.

Este pesqueiro tiña previsto o trasbordo da droga a unha lancha rápida á que tamén debería subministrar gasolina, unha planeadora que foi detectada abandonando a Ría de Arousa na mañá do día 21 pero que, ao frustrarse o transvasamento das substancias, fuxiu cara a Madeira, onde as tres persoas que ían nela a deixaron abandoada.

Sobre estas tres persoas, Coello explicou que están “perfectamente identificadas” -descartando que dous delas fosen os dous individuos que o luns se presentaron voluntariamente no xulgado vigués que leva a operación-. O subdelegado do Goberno explicou que a investigación continúa -está baixo segredo de sumario-, e agarda que, en colaboración coa Policía Judiciaria de Portugal, a Garda Civil e Vixilancia Aduaneira, poida culminar nun breve prazo de tempo.

En canto aos aproximadamente 3.000 quilos de cocaína, o xefe territorial de Vixilancia Aduaneira, Jaime Gayá, explicou que en primeira venda poderían alcanzar un valor de 100 millóns de euros. Así mesmo, sinalou que facía dous anos que en Galicia non se interceptaba “un alixo desta entidade”.

Pola súa banda, Coello destacou que nestes últimos anos se viña rexistrado un considerable aumento do prezo da droga -estimado nuns 6.000 euros o quilo, pasando dos 29.000 o quilo aos 35.000 euros- e que esta suba se debía á existencia de menor cantidade de droga na rúa.

DETIDOS

Segundo explicou o subdelegado, que cualificou a operación como un “éxito rotundo”, as investigacións víñanse desenvolvendo dende meses atrás, pois se detectou que o ‘Ratonero’ a finais de verán saíndo da zona de O Grove e cando ía faenar malia non levar útiles de pesca.

Así, se constatou que a nave tomaba unha ruta transoceánica, a cal os investigadores “están a comprobar”, se ben se cre que chegaría a “un punto próximo ás costas de Venezuela”. En todo caso, Coello precisou que “todo indica” que a droga que trasladaba cando foi interceptado procedía de Colombia.

Os cinco tripulantes, tres deles galegos, un uruguaio e outro colombiano; foron detidos en alto mar e está previsto que na tarde deste martes pasen a disposición do Xulgado de Instrución número tres, onde se lles tomará declaración. Na mañá deste luns, catro dos arrestados foron trasladados aos calabozos da Garda Civil en Vigo, mentres que o patrón permaneceu no barco mentres se efectuou a descarga da droga.

Es necesarios estar conectado para escribir un comentario Conectar