Científicos de Vigo aceleran os tempos de produción alimentaria

Un equipo de científicos do CSIC en Vigo logrou fixar un proceso mediante o que se reduce o tempo de secado a baleiro de bacterias, para producir queixos, pasando dun tempo de procesado de 36 a 29 horas. Isto conséguese ademais sen que se altere a calidade do produto.

Ao rebaixarse o tempo necesario para o procesado lógrase un aforro de custos de produción, que é o obxectivo da iniciativa. Esta consiste no desenvolvemento de esquemas de operación e de control óptimos sobre a preservación de bacterias lácticas -liofilización_ por secado ao baleiro, baixo unhas condicións concretas, as cales son de interese na fabricación de queixos.

Os investigadores levan meses traballando en modelos matemáticos, a fin de poder atopar a mellor combinación de temperatura e presión coa que operar este proceso. Como primeiro resultado, lograron reducir o tempo de secado en 7 horas, pasando de 36 a 29.

O equipo, que é o Grupo de Enxeñaría de Procesos, conta coa colaboración da empresa italiana SPES, da francesa PMS, da catalá Telstar e dun grupo de investigación do INRA.

PROXECTO CAFE

A iniciativa enmárcase dentro do proxecto CAFE (Computer Aided Food Process Engineering), unha investigación coordinada pola Universidade Católica de Lovaina, financiada da UE e na que participan 16 socios europeos.

A investigación céntrase nalgúns procesos representativos empregados na industria alimentaria, e ten como finalidade optimizar os custos de produción e tempo de fabricación, así como mellorar a calidade dos produtos.

Para iso estúdanse os casos da elaboración de viño, queixos, cervexa e xeados e que son representativos de catro procesos característicos da industria alimentaria: a bioconversión –veu–, a liofilización –queixos–, a separación –cervexa– e a estructuración –xeado–.

Así, empréganse  modelos matemáticos e investígase sobre ferramentas informáticas –tanto software como hardware– que permitan garantir un control eficiente e flexible dos procesos, reducir os seus custos de produción e maximizar a calidade dos produtos.

Es necesarios estar conectado para escribir un comentario Conectar